Konferenca e parë ndërqeveritare, kryenegociatori Mazi takim me sekretarin sllovak për Punët e Jashtme

Ditën e djeshme, kryenegociatori i Shqipërisë me Bashkimin Evropian, Zef Mazi priti në  Kryeministri Sekretarin e Shtetit të Ministrisë së Punëve të Jashtme dhe Europën të Sllovakisë, Martin Klus.

Mësohet se tema kryesore e takimit ishte procesi aktual dhe ndërmarrja e hapave të ardhshëm për rrugëtimin integrues të Shqipërisë në BE.

Gjatë takimit kryenegociatori i shprehu z.Klus mirënjohjen për mbështetjen që Sllovakia i ka dhënë Shqipërisë si dhe folën për nevojën e përshpejtimit të proceseve integruese si për Shqipërinë ashtu dhe për vendet e tjera të Ballkanit Perëndimor, si një trend i cili nuk duhet të zbehet.

Gjithashtu, zoti Mazi bëri një pasqyrim të realizimit plotësisht nga Shqipëria të detyrave të lëna në Konkluzionet e Këshillit të Marsit 2020.

Ndërsa, sekretari i Shtetit z.Klus shprehu vlerësimet më të larta për reformat e ndërmarra nga Shqipëria në fushën e drejtësisë, lirive themelore dhe luftën ndaj krimit të organizuar.

Ai nënvizoi se reforma në drejtësi e Shqipërisë është reforma më e plotë e realizuar në këtë fushë nga një vend kandidat për BE-në.

Në mbyllje të takimit, kryenegociatori Mazi dhe Sekretari i Shtetit sllovak ranë dakord për vijimin dhe hapjen e konferencës së parë ndërqeveritare Shqipëri-BE.

Sakaq, u ra dakord për të krijuar bashkëpunime teknike mes dy vendeve për disa fusha të caktuara ku Sllovakia ka ekspertizën e duhur.

Nuk mungoi edhe një ftesë nga z.Klus për kryenegociatorin Mazi për një vizitë zyrtare në Sllovaki gjatë muajit maj.