Konflikti në Gaza, dështon përpjekja e Biden për armëpushim

Kombet e Bashkuara kanë deklaruar se Izraeli nuk ka marrë masa “të përshtatshme” për të garantuar jetën e punonjësve humanitarë dhe civilëve në Gaza. Sekretari i përgjithshëm Antonio Guterres shprehu shpresën e tij që premtimet e shtetit hebre për hapjen e dy kalimeve për ndihmat të materializohen.

Ndërkohë, bisedimet e paqes në Kajro rrezikojnë të hyjnë në ngërç. Mediat ndërkombëtare raportojnë se Hamasi refuzoi të premten propozimin e Izraelit për një shkëmbim të burgosurish dhe armëpushim, me argumentin se ofertat nuk përmbushnin asnjë nga kërkesat e saj.

Zyrtarë amerikanë planifikonin të rifillonin dialogun këtë fundjavë, por mediat izraelite bënë me dije se refuzimi i lëvizjes islamike bëri që autoritetet hebraike të vinin në dyshim vazhdimin e negociatave.

Ndërkohë, presidenti Joe Biden u përpoq ta stimulonte procesin. Duke cituar një burim pranë administratës amerikane, “The Times of Israel” shkroi se shefi i Shtëpisë së Bardhë i shkroi letra liderëve të Egjiptit dhe Katarit, duke u kërkuar atyre që t’i bënin presion Hamasit të pranonte ofertën e Izraelit.

LEXONI GJITHASHTU: 

• Biden i prerë me Netanyahun: Mbështetja amerikane për luftën varet nga masat e reja
• Biden: Mbështetja e SHBA-së për Izraelin varet nga mbrojtja e civilëve