Kontrollet në Tiranë, arrestohet shoferi me armë në brez, shfaqi sjellje nervoze

Në kuadër të një operacioni të gjerë për goditjen e veprimtarisë kriminale të armëmbajtjes pa leje, Forca e Posaçme “Shqiponja” në bashkëpunim me Komisariatin e Policisë Nr. 2 ka finalizuar operacionin “Flagranca 2” duke vënë në pranga dy persona.

“Pas informacionit të siguruar nga inteligjenca policore dhe kontrolleve të pandërprera në terren, në rrugën “Isuf Elezi”, shërbimet e policisë kanë ndaluar për kontroll automjetin që drejtohej nga 37-vjeçari A. K. dhe pasagjeri A. Z., 39 vjeç”.

“Gjatë intervistimit nga punonjësit e policisë të dy këta shtetas kanë shfaqur shenja nervozizmi duke i shtyrë efektivët të kryejnë një kontroll të detajuar. Pas kontrollit fizik të ushtruar ndaj shtetasit A. K, shërbimet e Policisë i kanë gjetur në brez një armë zjarri pistoletë dhe municion luftarak, të cilat u sekuestruan në cilësinë e provës materiale”.

Policia arrestoi 37-vjeçarin A. K. për “Armëmbajtja pa leje”, ndërsa 39-vjeçari A. Z. u arrestua për “Moskallëzim krimi”.

Materialet procedurale iu kaluan Prokurorisë për veprime të mëtejshme.

LEXONI GJITHASHTU:

• EMRI/ Nga Lezha në Tiranë me armë pa leje, arrestohet 33-vjeçari
• Rrëfehet Nuredin Dumani, dëshmon lidhjet me policinë: Si kaloja me armë në kufi