KQZ letër PS dhe PD: Hiqni materialet propagandistike nga godinat publike

Komisioni Qendror i Zgjedhjeve, përmes një letre drejtuar dy partive të mëdha që garojnë në zgjedhjet e 25 prillit, Partisë Socialiste dhe Partisë Demokratike me koalicionin e saj, u kërkon që të respektojnë kodin zgjedhor dhe të mos afishojnë postera dhe materiale propagandistike nëpër institucionet publike.

Në zbatim të dispozitave ligjore dhe respektimit të rregullave për një fushatë zgjedhore sipas standardeve, KQZ ka kërkuar nga koalicioni Partia Demokratike Aleanca për Ndryshimin PD-AN, heqjen e menjëhershme të materialit propagandistik të vendosur në fasadën e godinës së universitetit të Tiranës.

Gjithashtu, në letrën drejtuar Partisë Socialiste, KQZ teksa rikujton se partitë duhet të zhvillojë një fushatë të qetë duke shmangur politikat e polarizimit dhe retorikat denigruese ndaj kundërshtarëve, kërkon nga ky subjekt politik heqjen e menjëhershme të dy materialeve propagandistike në bashkinë Gjirokastër për të cilat dje pati një denoncim publik.

KQZ i referohet në rastin e fundit një denoncimi të publikuar në faqen zyrtarë të Facebook nga kreu i shtetit Ilir Meta, i cili postoi dy foto të posterave elektoralë të PS në Gjirokastër ku ishte i përfshirë edhe vetë presidenti.