Kreu i Bashkisë Tiranë njofton miratimin e lejes për ndërtimin e Teatrit të ri Kombëtar

Kryetari i Bashkisë së Tiranës Erion Veliaj bën me dije se Këshillit Kombëtar i Territorit ka miratuar sot lejen për ndërtimin e Teatrit të ri Kombëtar.

“KKT e Qeverisë Shqiptare sapo miratoi lejen për Teatrin e Ri Kombëtar të Bashkia Tiranë nga Bjarke Ingels (BIG)”,  shkruan Veliaj në “Facebook”.

Ky vendim i KKT-së vjen në një kohë kur Gjykata Kushtetuese nuk ka zbardhur ende vendimin në lidhje me padinë e kreut të shtetit Ilir Meta për prishjen e godinës së mëparshme.

Presidenti i Republikës ka kërkuar nga Gjykata Kushtetuese shfuqizimin e kalimit të pronësisë së teatrit nga Ministria e Kulturës tek Bashkia Tiranë dhe shfuqizim të procedurës së kontratës për ndërtimin e godinës së re të Teatrit Kombëtar.

Godina e Teatrit Kombëtar u shemb me datë 17 maj të vitit 2020, pak orë para se të gdhinte, ndërsa aktivistët për mbrojtjen e tij ishin në ambientet e teatrit. Atë ditë dhe ditët në vazhdim pati protesta nga aktivistë dhe nga shoqëria civile.

Debati për ndërtimin e Teatrit të ri Kombëtar nisi në fund të vitit 2017 dhe fillim të vitit 2018, por shembja e godinës u bë pasi kryebashkiaku Erion Veliaj arriti marrëveshjen me disa nga artistët për ndërtimin e godinës së re.

LEXONI GJITHASHTU: 

• Pritet vendimi përfundimtar për Teatrin, presidenti kërkon pezullimin e çdo veprimi
• “Kushtetuesja” shtyn për më 15 qershor seancën për çështjen e Teatrit Kombëtar