Kreu i Federatës Spanjolle të Futbollit kritikohet për puthjen në buzë të lojtares

Presidenti i Federatës Spanjolle të Futbollit, Luis Rubiales është kritikuar për puthjen në buzë të Jenni Hermoso, pasi Spanja fitoi Kupën e Botës për femra.

Rubiales puthi Hermoson gjatë ceremonisë pas fitores 1-0 të Spanjës ndaj Anglisë në finalen e së dielës.

“Nuk më pëlqeu”, tha Hermoso në Instagram, por një deklaratë e lëshuar më vonë në emër të saj mbrojti Rubiales.

Ministrja e qeverisë Irene Montero tha: “Është një formë e dhunës seksuale që gratë vuajnë çdo ditë”.

Montero, ministre e barazive e Spanjës, shtoi se deri më tani ka qenë “e padukshme” dhe se është diçka që “ne nuk mund ta normalizojmë”.

“Nuk duhet të supozojmë se puthja pa pëlqim është diçka që ‘ndodh’”, tha ajo.

Në komentet e lëshuara më vonë nga federata spanjolle e futbollit Hermoso – golashënuesja më e mirë e të gjitha kohërave të Spanjës – tha se momenti ishte një “gjest i natyrshëm dashurie”.

“Ishte një gjest reciprok krejtësisht spontan për shkak të gëzimit të jashtëzakonshëm që sjell fitimi i një Kupe Botërore”, shtoi sulmuesja 31-vjeçare.

Veprimet e Rubiales u kritikuan shumë në mediat sociale. Rubiales i tha transmetuesit spanjoll COPE se ishte “një puthje mes dy miqve që festonin diçka” dhe atyre që e shihnin ndryshe ishin “idiotë dhe budallenj”.

“Le t’i injorojmë ato dhe të shijojmë të mirat”, shtoi ai.

Spanja fitoi Kupën e Botës pavarësisht polemikave për trajnerin Jorge Vilda, i cili i mbijetoi revoltë së lojtareve për të mbajtur detyrën.

LEXONI GJITHASHTU:

• Spanja fiton Kupën e Botës në futboll për femra
• Spanja përballet me valën e katërt të të nxehtit, temperaturat deri në 44 gradë