Krishtlindja në Kosovë, ipeshkvi uron besimtarët dhe i bën thirrje klasës politike për reflektim

Krishtlindjet u shënuan edhe këtë vit në Kosovë.

Përveç mesazheve të paqes, Ipeshkvi i Dioqezës Prizren-Prishtinë Dodë Gjergji, pati një thirrje edhe për politikën e qytetarët.

“E ndiej të nevojshme t’ju ftoj të jemi më të përgjegjshëm për të restauruar gjendjen në të cilin kemi jetuar në vitin që po lëmë pas, duke kryer obligimin qytetar, pasi do të kontribuojnë të gjithë që vendi të ketë stabilitet të qëndrueshëm politik, të përshpejtojë hapat drejt familjes evropiane dhe të arrijë të ruajë vlerat bazike të shoqërisë sonë”, tha Dodë Gjergji, ipeshkvi i Dioqezës Prizren-Prishtinë.

Ndërkohë, para meshës kryesore, Ipeshkvia organizoi pritje në Katedralen “Shën Nënë Tereza” në Prishtinë, ku e pranishme ishte edhe presidentja e vendit, Vjosa Osmani.

Ndërsa, sot në Ditën e Krishtlindjes, nga ora 11:00 mbahet përsëri mesha në Katedralen “Shën Nënë Tereza”, ndërsa nga ora 18:00 mesha në Kishën e “Shën Ndout” në “Ulpianë”, Prishtinë.

Mesha e feste pati edhe në Prizren e vende te tjera.