Donald Trump ka caktuar si sekretar të Shëndetësisë Robert F. Kennedy Jr., duke ngjallur shumë polemika në Shtetet e Bashkuara. Kennedy, i njohur për qëndrimet e tij skeptike ndaj vaksinave, do të mbikëqyrë një gamë të gjerë agjencish, përfshirë Agjencinë Kombëtare të Shëndetit Publik dhe Qendrën për Kontrollin dhe Parandalimin e Sëmundjeve (CDC).
Në një intervistë vitin e kaluar, Kennedy tha: “Unë besoj se autizmi vjen nga vaksinat,” një deklaratë që ka nxitur kritika nga shkencëtarët dhe ekspertët shëndetësorë, të cilët kanë theksuar se studimet nuk kanë treguar asnjë lidhje mes vaksinave dhe çrregullimit të spektrit të autizmit.
Pavarësisht këtij qëndrimi, Kennedy ka pasur një histori të angazhimit në çështje shëndetësore, veçanërisht në luftën kundër krizës së varësisë nga droga. Ai vetë ka qenë i varur nga heroina për 14 vjet dhe ka folur shpesh për rëndësinë e adresimit të krizës së varësisë.
Në vitin 2023, ai deklaroi në një intervistë për Daily Mail: “Ne po humbasim një brez të tërë rinie. Ne humbëm 106,000 njerëz vetëm këtë vit nga vdekjet me fentanil.” Shifra e vërtetë ka qenë edhe më e lartë, me më shumë se 107,500 viktima.
Nëse emërimi i tij konfirmohet, Kennedy do të ketë mundësinë të udhëheqë politikat shëndetësore të vendit në një periudhë të vështirë, pasi Shtetet e Bashkuara vazhdojnë të përballen me sfida të mëdha në fushën e shëndetit publik.
LEXONI GJITHASHTU:
- Republikanët marrin Dhomën e Përfaqësuesve, Trump kontroll total në Uashington
- Ekipi i Trump shmang kontrollet, të përzgjedhurit nuk i nënshtrohen vetingut të FBI
