Donald Trump është akuzuar për tradhti ndaj Ukrainës pas bisedës telefonike me presidentin Putin.
Edhe pse Trump ka thënë se tani ka mundësi të mira për arritjen e paqes, presidenti ukrainas Zelensky ka bërë të ditur se Kievi nuk do ta pranojë asnjë zgjidhje nëse nuk është i përfshirë në negociata.
“Sot ka mundësi të mira për t’i dhënë fund asaj lufte të tmerrshme dhe të përgjakshme,” ka thënë Trump në profilin e tij në rrjetin “Truth Social”.
Komentet e tij vijnë pak pasi sekretari amerikan i Mbrojtjes, Pete Hegseth, insistoi se përpjekjet e shefit të Shtëpisë së Bardhë për të negociuar një marrëveshje paqeje me Rusinë nuk përbëjnë një tradhti për ushtarët ukrainas.
Disa zyrtarë ukrainas kanë deklaruar për BBC se kanë frikë se Putin mund të përpiqet ta blejë qëndrimin e Trump.
Ndërkohë, vetë presidenti ukrainas Volodymyr Zelensky ka deklaruar se vendi i tij nuk do ta pranojë asnjë marrëveshje të arritur mes Shteteve të Bashkuara dhe Rusisë pa përfshirjen e Kievit.
Duke folur para gazetarëve, Zelensky ka theksuar se është me rëndësi që gjërat të mos shkojnë sipas planeve të Putin, i cili, sipas tij, kërkon të bëjë gjithçka që negociatat të jenë dypalëshe me Trump.
Zelensky ka shtuar se nuk e diskutoi me Trump çështjen e anëtarësimit të Ukrainës në NATO, por është shprehur i vetëdijshëm se Shtetet e Bashkuara nuk e duan këtë.
Kundërshtarëve të lëvizjes së Trump iu është bashkuar ndërkohë edhe ish-këshilltari i tij për sigurinë gjatë administratës së parë, John Bolton.
“Në mënyrë të qartë, presidenti Trump u dorëzua para Vladimir Putin në negociatat për fatin e Ukrainës,” ka thënë Bolton në një intervistë për CNN.
LEXONI GJITHASHTU:
- Shefi i NATO-s flet pas bisedës Putin-Trump, zbulon sybimin e aleancës në bisedime
- Plani i Trump| Ministrat e NATO skeptikë: S’ka negociata për Ukrainën, pa Ukrainën
