Kritikat e Ramës për BE-në mbi vaksinat, Lulzim Basha: Sulmet nuk e mbulojnë dot dështimin e tij

Kryetari i Partisë Demokratike, Lulzim Basha, i ka cilësuar të turpshme sulmet e kryeministrit Edi Rama ndaj vendeve të BE-së se nuk po i ndihmojnë vendet e Ballkanit Perëndimor për t’iu siguruar vaksinën anti-Covid.

Me një shënim në “Twitter” z. Basha thotë se nuk është faji i BE-së pse Shqipëria është vendi më i korruptuar në Europë.

“E turpshme që Tirja i qeverisë sulmon BE-në dhe vendet anëtare për dështimet e tij. Nuk është faji i BE që Shqipëria është vendi më i korruptuar në Europë. Nuk është faji i BE që Tirja i qeverisë u ka dhënë qytetarëve ndihmën më të ulët nga çdo vend tjetër”, shkruan Basha.

Për kreun e demokratëve, kryeministri Rama ka dështuar në drejtimin e vendit.

“Nuk është faji i BE që Tirja i qeverisë i braktisi shqiptarët në kohën e tërmetit, pandemisë dhe krizës ekonomike. Nuk është faji i BE që Rama është një dështim në çdo gjë’, shton Basha.

Teksa deklaron se 25 prilli do jetë rruga e ndarjes me të keqen, kryedemokrati shton se Shqipëria u është mirënjohëse përjetë vendeve të Bashkimit Europian për mbështetjen që i kanë dhënë.

“Sulmet ndaj BE dhe vendeve anëtare nuk e mbulojnë dot dështimin e tij. Ne i jemi përjetë mirënjohës BE për mbështetjen që i ka dhënë Shqipërisë në momente të vështira për vendin. 25 prilli do të jetë ditë e ndarjes nga e keqja dhe e orientimit europian të Shqipërisë”, shkruan lideri i opozitës.

Ambasada e Francës në Shqipëri përmes një letre dërguar Ministrisë për Evropën dhe Punët e Jashtme tha se kritikat e Ramës ndaj vendeve të unionit janë të papërshtatshme.

Në letër thuhej gjithashtu se BE-ja është donatori më i madh në Shqipëri me më shumë se 100 milionë euro, në sektorë të ndryshëm. 

Lexoni gjithashtu: 

Vaksinat kundër COVID-19, Ambasada Franceze i përgjigjet kritikave të Kryeministrit Rama

COVID-19, Varhelyi: Po punojmë për t’i garantuar Ballkanit Perëndimor vaksinën