Kryemadhi qytetarja e parë që voton: Fitorja e LSI e patjetërsueshme

Kryetarja e Lëvizjes Socialiste për Integrim Monika Kryemadhi ishte politikania e parë që hodhi votën këtë të diel në orën 7:00. Znj. Kryemadhi votoi në kopshtin nr. 31, në njësinë 5, pak metra larg selisë së LSI-së në Tiranë.

Në një deklaratë për mediat pas votimit. znj. Kryemadhi  u bëri thirrje qytetarëve të votojnë të qetë e të bindur për atë që duan të realizojnë me anë të votës së tyre.

“Dua t’ju bëj thirrje sot të gjithë qytetarëve që t’ju drejtohen qendrave të votimit të qetë, të bindur, për atë që duan të realizojnë nëpërmjet votës së tyre. Vota e qytetarëve është një votë e shenjtë, është një votë që për hir të së vërtetës do t’i japë mundësinë dhe shansin të rinjve dhe të rejave, të gjithë qytetarëve, që nëpërmjet verdiktit të tyre të çojmë Shqipërinë më shumë se kurrë drejt Evropës.

Unë ju uroj suksese të gjithë kandidatëve, sidomos kandidatëve të LSI-së, siç ndodh gjithmonë, kështu që jam e bindur që fitorja do të jetë e patjetërsueshme për LSI-në”, deklaroi z. Kryemadhi.