Kryeministri belg: Përdorimi i aseteve ruse mund të prishë marrëveshjen e paqes

Kryeministri Belgjikës, Bart De Wever, tha se plani i Bashkimit Evropian për të përdorur asetet e ngrira ruse për të financuar Ukrainën mund të rrezikojë shanset për një marrëveshje të mundshme paqeje që do t’i jepte fund luftës gati katërvjeçare.

Sipas një plani të paraqitur nga Presidentja e Komisionit Evropian, Ursula von der Leyen, asetet e ngrira të bankës qendrore ruse në Evropë do t’i jepnin hua Ukrainës që t’i përdorte për nevojat e mbrojtjes dhe buxhetit të rregullt.

“Ecja e nxituar përpara me skemën e propozuar të kredisë për dëmshpërblime do të kishte si dëm kolateral, që ne si BE po pengojmë në mënyrë efektive arritjen e një marrëveshjeje përfundimtare paqeje”, tha De Wever në një letër drejtuar Ursula von der Leyen.

Mbështetja e Belgjikës për planin është thelbësore pasi asetet që BE-ja shpreson të përdorë mbahen nga institucioni financiar belg Euroclear.

“Skema e propozuar e kredisë për dëmshpërblime është sipas mendimit tim thelbësisht e gabuar”, tha De Wever, duke shtuar se historikisht, gjatë një lufte, asetet e palëvizshme nuk ishin vënë kurrë në përdorim.

“Asetet e tilla kanë qenë objekt i vendimeve gjatë marrëveshjeve pas luftës, zakonisht në kontekstin e dëmshpërblimeve të luftës nga pala humbëse”, është shprehur ai.

LEXONI GJITHASHTU:

• Parlamenti Evropian kërkon shpronësimin e aseteve ruse para marrëveshjes për paqe
• Von der Leyen: Asetet ruse janë mënyra më efektive për të financuar Ukrainën