Kryeministri i sapoemëruar francez Barnier: Franca ka nevojë për respekt dhe unitet 

Kryeministri i sapoemëruar francez Michel Barnier tha sot se Franca ka nevojë për respekt, unitet dhe paqe dhe premtoi se do të bashkëpunojë me të gjithë ata që tregojnë vullnet të mirë.

Barnier e tha këtë në fjalimin e tij të parë si kryeministër, ndërsa paraardhësi i tij Gabriel Attal qëndroi pranë tij, raportoi Reuters.

Presidenti francez Emmanuel Macron emëroi sot ish-komisionerin evropian Michel Barnier si kryeministër të ri.

Macron i kërkoi Barnier, ish-ministrit të Jashtëm francez dhe negociatorit të BE-së për Brexit, të “formojë një qeveri të unitetit kombëtar në shërbim të vendit”, sipas mediave franceze.

Barnier u emërua në postin e kryeministrit pas më shumë se 50 ditëve të qeverisë së përkohshme dhe konsultimeve dhe presioneve të gjata nga opozita ndaj presidentit francez për të emëruar sa më shpejt një kryeministër.