Kryeministri i Spanjës zotohet të hetojë ndërprerjen e energjisë elektrike

Kryeministri i Spanjës, Pedro Sánchez, ka premtuar se do të “zbulojë deri në fund” shkakun e ndërprerjes së paprecedentë të energjisë elektrike që goditi gadishullin Iberik të hënën, ndërkohë që operatorët e energjisë në Spanjë dhe Portugali përjashtuan mundësinë e një sulmi kibernetik.

Ndërprerja e energjisë zgjati për disa orë, duke lënë qytetet në errësirë dhe duke bllokuar dhjetëra mijëra udhëtarë në trena. Pas ndikimit të kësaj ndërprerjeje, mendohet se pesë persona kanë humbur jetën në Spanjë. Një familje me tre anëtarë ka ndërruar jetë nga helmimi me monoksid karboni pasi përdori një gjenerator në veriperëndim të vendit, një grua ka vdekur në Valencia për shkak të defektit të aparatit të oksigjenit, ndërsa një tjetër grua humbi jetën në Madrid nga një zjarr që shpërtheu nga një qiri.

Në një deklaratë të martën në mëngjes, pasi energjia elektrike ishte rikthyer në të dy vendet, Sánchez theksoi se ishte ende herët për të kuptuar saktësisht shkakun e problemit, por u shpreh i vendosur se do të merren masa për të parandaluar ndodhjen e incidenteve të ngjashme në të ardhmen.

“Është e qartë se ajo që ndodhi dje nuk mund të ndodhë përsëri,” tha ai, duke njoftuar krijimin e një komisioni të posaçëm që do të hetojë incidentin dhe do të shqyrtojë rolin e kompanive private të energjisë.

Kryeministri Sánchez siguroi se administrata e tij do të merrej me çdo reformë dhe masë të nevojshme për të parandaluar përsëritjen e një ngjarje të tillë në të ardhmen.

LEXONI GJITHASHTU:

• Pas një errësire masive në Spanjë, pjesë të Groenlandës mbetën pa sinjal satelitor
• Energjia elektrike rikthehet në 90% në Spanjë e Portugali, por pasojat vijojnë