Kryeministri japonez përballë sfidës për ruajtjen e balancave në takimin me Trump

Kur kryeministri i Japonisë Shigeru Ishiba të takohet të premten me Presidentin e Shteteve të Bashkuara Donald Trump, në Shtëpinë e Bardhë, objektivi i tij, sipas zyrtarëve japonezë, do të jetë shumë i qartë: të konfirmojë aleancën SHBA-Japoni dhe të ndërtojë një marrëdhënie të fortë me zotin Trump.

Por shumë në Tokio thonë se objektivi i zotit Ishiba është edhe më i thjeshtë – të shmangë një katastrofë diplomatike me Presidentin e ri të rizgjedhur Donald Trump, i cili e ka kthyer edhe me më shumë intensitet se sa gjatë mandatit të tij të parë, politikën e jashtme – “Amerika e Para”.

Në më pak se sa tre javë që nga marrja e detyrës, zoti Trump ka përshkallëzuar trysninë ndaj aleatëve dhe partnerëve të Shteteve të Bashkuara, shpesh në mënyrë të papritur dhe të paparashikueshme.

Ai ka kërcënuar se do të vendosë tarifa për Meksikën dhe Kanadanë, ndërsa ka ngritur mundësinë për veprime ushtarake kundër karteleve dhe ka sugjeruar që Kanadaja të bëhet shteti i 51-të. Ai ka kërkuar marrjen e Groenlandës nga Danimarka, një vend anëtar i NATO-s dhe ka paralajmëruar Panamanë se nëse nuk frenon ndikimin kinez, Shtetet e Bashkuara mund të marrin me forcë kontrollin e Kanalit të Panamasë.

Këto zhvillime kanë shqetësuar shumë njerëz në Tokio, i cili mbështetet tek “ombrella bërthamore” e Shteteve të Bashkuara dhe është renditur prej kohësh krah idesë së një rendi ndërkombëtar, të bazuar në rregulla, nën udhëheqjen e Shteteve të Bashkuara.

LEXONI GJITHASHTU:

• Demokratët procedurë për shkarkimin e Trump: Spastrimi etnik në Gaza s’është shaka
• Bill Gates takohet me Trump, i kërkon të ndryshojë qëndrim për mbylljen e USAID