Kryeministri Rama akuza presidentit: Po zhvillon fushatë skutash në Vlorë me subjekte të OFL-së

Nga Saranda, kryeministri Edi Rama akuzoi presidentin Ilir Meta se po zhvillon fushatë në qarkun e Vlorës me prokurorë dhe gjyqtarë të përjashtuar nga vetingu.

“Ka vendosur kandidaturën dhe zhvillon një fushatë skutash me subjektet e OFL-së, premton lart e poshtë se do t’iu nxjerr njerëzit nga burgu, prokurorë dhe gjyqtar të korruptuar që u goditën nga vetingu janë mbledhur dhe lëvizin si një kope hienash duke u futur zgëqeve”, tha kreu i qeverisë.

Në një bashkëbisedim me qytetarët në kuadër të fushatës, kryeministri komentoi sërish bllokimin e aeroportit për 48 orë, për të cilin bëri përgjegjës dyshen Meta-Berisha.

“Janë ata që e morën peng aeroportin. Janë ata që janë gati të djegin nga e para Shqipërinë, po të jetë nevoja për të arritur synimin e tyre”, tha kryeministri.

Kreu i qeverisë nuk la mënjane as batutat ndaj kryedemokratit Lulzim Basha.

“Kam qenë më të, kam treguar barsoletat e dynjasë që të mos e zinte gjumi”. Kjo është e vërtetë se shkoi shumë vonë”, tha kryeministri.