Kryeparlamentari i Ukrainës i përgjigjet Trump: Na duhen plumba, jo fletëvotime

Kryetari i Parlamentit të Ukrainës, Ruslan Stefanchuk, ka reaguar ndaj sugjerimeve për mbajtjen e zgjedhjeve të reja në Ukrainë, duke deklaruar se vendit të tij i nevojiten armë për të vazhduar luftën për liri, jo procese elektorale.

Në një postim në platformën X, Stefanchuk theksoi se presidenti Volodymyr Zelenskyy është zgjedhur përmes zgjedhjeve demokratike dhe aktualisht po udhëheq vendin në luftën kundër agresionit rus. Ai gjithashtu akuzoi Moskën se nuk ka qenë kurrë e interesuar për paqe dhe bëri thirrje për rritje të mbështetjes me armë dhe sanksione nga Perëndimi.

Reagimi i tij vjen pasi ish-presidenti amerikan, Donald Trump, pretendoi se popullariteti i Zelenskyyt është vetëm 4%, duke sugjeruar mbajtjen e zgjedhjeve të reja. Ky pretendim është hedhur poshtë nga Zelenskyy, i cili e cilësoi atë si dezinformatë të përhapur nga Rusia, duke theksuar se Ukraina ka prova që tregojnë se këto shifra janë diskutuar gjatë një takimi mes zyrtarëve amerikanë dhe rusë.

Edhe sipas mediave amerikane, një nga temat kryesore të diskutimit në negociatat SHBA-Rusi, në Riad, ishte organizimi i zgjedhjeve të reja në Ukrainë, me argumentin se Zelenskyy ka gjasa të ulëta për t’u rizgjedhur. Sipas Moskës, një kandidat tjetër mund të ishte më fleksibël dhe i gatshëm për negociata.

Sipas burimeve diplomatike, plani i diskutuar përfshin tre hapa kryesorë: shpalljen e një armëpushimi në Ukrainë, mbajtjen e zgjedhjeve të reja dhe, më pas, firmosjen e një marrëveshjeje paqeje.

LEXONI GJITHASHTU:

• Kriset marrëdhënia, presidenti i Ukrainës kritika të forta Donald Trump
• Trump fajësoi Ukrainën për luftën, negociatat SHBA- Rusi shkaktojnë zemërim në Kiev