Pamje të reja satelitore tregojnë varret masive në fshatin Manhush, rreth 20 kilometra në perëndim të Mariupolit.
Kompania e teknologjisë satelitore “Maxar” deklaroi se pamjet tregojnë se ekspansioni i varreve nisi më 23 mars dhe ka vijuar përgjatë dy javëve të fundit.
Në rajonin e Kievit, hetues të policisë dhe mjekësisë ligjore po dokumentojnë krimet e luftës që u atribuohen trupave ruse.
“Në këto 8 javë, ligji ndërkombëtar për të drejtat e njeriut jo vetëm është injoruar, por është shpërfillur tërësisht, pasi trupat ruse kanë sulmuar dhe bombarduar zonat e banuara, duke vrarë civilë dhe dëmtuar spitale, shkolla dhe infrastruktura të tjera, veprime që mund të përbëjnë krime lufte”, tha Ravina Shamdasani, zëdhënëse e OKB-së për të Drejtat e Njeriut.
Kryeprokurorja e Ukrainës, Iryna Venediktova thotë se mbështetja e Evropës dhe Gjykatës Ndërkombëtare Penale është jetike për të dërguar autorët e krimeve në gjykatë.
“Kemi konstatuar 7 mijë e 661 raste që në vetvete janë krime lufte dhe mbi 3 mijë raste, të cilat janë të lidhura me krimet e luftës. Kur zhvarrosim viktimat nga varret masive shohim shenja torture në trupat e tyre. Ata janë qëlluar me duart e lidhura nga pas. Kemi gjithashtu fakte të krimeve seksuale kundër civilëve, jo vetëm ndaj grave, por edhe ndaj burrave dhe fëmijëve”, u shpreh ajo.
Trupat e 9 civilëve, disa prej të cilëve me shenja torture, u gjetën në 24 orët e fundit në qytetin Borodjanka, në rrethinat e kryeqytetit ukrainas.
LEXONI GJITHASHTU
- Bajraktari: Në Donbas dhe Donjeck po zhvillohen luftime të përgjakshme
- Rusia mund ta fitojë luftën në Ukrainë, thotë Xhonson
- Kush e kontrollon Mariupolin? Pretendimi i rusëve dhe reagimi i SHBA-së
