Kryesia e PD vendim për zgjedhjet, Berisha: Do të mbështesim kandidatët e pavarur

Sali Berisha, kryetar i PD-së ka folur pas mbledhjes së kryesisë ku ka thënë se do të mbështesë kandidatët e pavarur.

Berisha deklaroi se PD vlerëson shumë kandidaturat e pavarura, për të cilët tha se historia ka treguar se janë më të suksesshme.

“Ishte një mbledhje e veçantë, me një diskutim të gjatë dhe përgjegjshëm. U shprehën mendime për problematikat. Ajo që predominonte ishte se PD, ndonëse pa diskutim ka kandidatë kalibri, pa asnjë lloj krahasimi me organizatën kriminale në pushtet, vlerëson dhe çmon kandidaturat e pavarura. Kandidati i pavarur është ai që shpall veten. “-tha Berisha.

“Do konsiderojë me seriozitetin më të madh, kandidatë të pavarur të cilët garojnë si të tillë dhe që konsiderojnë të nevojshme për fitoren e tyre, mbështetjen e PD-së. Besoj se në një valë me këtë nga diskutimet paraprake janë dhe forcat e tjera opozitare. Dhe kjo jo vetëm në bashkinë e Tiranës, por dhe në bashkitë e tjera. Ky është një moment do të mendoja unë, për të gjithë ata qytetarë, intelektualë, ata specialistë, ekspertë që ndihen të gatshëm të përballen me narkoshtetin, të matin forcat e tyre në një garë në interesin më të mirë të qytetarëve të marrin vendimin e duhur”, tha Berisha.

“Vendimi është një vendim jashtëzakonisht i rëndësishëm i jep opozitës shqiptare një dimension tjetër. Ne u themi personaliteteve të vendit, intelektualëve të vendit, ekspertëve u themi, atyre të cilët ndihen të gatshëm të përballen të marrin vendimin e duhur dhe ne qëndrojmë të hapur ndaj tyre” , tha Berisha.