Kryqëzoi shqiponjën të gjallë, kapet autori. I gjejnë në shtëpi 2 sorkadhe të vrara

Është arrestuar personi i cili masakroi mizorisht shqiponjën në Përmet. Bëhet fjalë për ngjarjen e ndodhur në fshatin Buhal, ku ditën e djeshme u gjet një shqiponjë e cila ishte plagosur, e ishte kryqëzuar e gjallë një gardh.

Ajo u morr nga punonjësit e policisë e u dërgua te veterineri, por nuk u shpëtoi plagëve të marra e ditën e sotme ngordhi.

policia bëri të mundur arrestimin e autorit të kësaj ngjarje makabre. Gjatë kontrollit të policisë në shtëpinë e autorit 35-vjeçar me inicialet N.A., policia gjeti edhe dy sorkadhe të vrara dy ditë më parë.

Njoftimi i policisë

Identifikohet dhe arrestohet autori i keqtrajtimit të shpendit (shqiponjë), ngjarje e ndodhur ditën e djeshme.

Shërbimet e Komisariatit të Policisë Përmet, bazuar në inteligjencën policore, në vijim të veprimeve hetimore të kryera për identifikimin e autorit të keqtrajtimit të shpendit shqiponjë, ditën e djeshme, kanë bërë të mundur identifikimin, kapjen dhe shoqërimin e shtetasit N. A., 35 vjeç, banues në Përmet.

Gjatë kontrollit të ushtruar në banesën e tij, shërbimet e Policisë kanë gjetur 2 sorkadhe të cilat ky shtetas ka deklaruar se i ka vrarë me armë gjahu (çifte), dy ditë më parë.

Në vijim të veprimeve u bë arrestimi në flagrancë i shtetasit N. A., pasi dyshohet të jetë autori i keqtrajtimit të shpendit (shqiponjë).

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.

LEXONI GJITHASHTU:

• Guterres: Thellësisht i shqetësuar për rrethimin e Gazës nga Izraeli
• INSTAT: Rriten çmimet e produkteve ushqimore