Kthehet në shtëpi pengu francez pas dy vitesh burg në Iran

Francezi, Louis Arnaud, është kthyer në atdhe pas gati dy vitesh burgosje në Iran. Autoritetet iraniane e liruan Arnaud, i cili kishte qëndruar në burg për mbi 20 muaj. Ai arriti në Francë të enjten, ku u prit nga familja e tij dhe ministri i Jashtëm francez, Stéphane Séjourné, në aeroportin e Parisit.

Arnaud, një konsulent i cili kishte nisur një udhëtim botëror në korrik të vitit 2022, u arrestua në Iran në shtator të po atij viti. Ai u akuzua për pjesëmarrje në protestat që pasuan vdekjen e Mahsa Amini, një vajze iraniane me origjinë kurde, e arrestuar për mosrespektim të kodit të rreptë të veshjes për gratë në Iran.

Presidenti francez Emmanuel Macron ka bërë thirrje për lirimin e tre shtetasve të tjerë francezë të mbajtur ende në Iran, përfshirë Cécile Kohler, Jacques Paris dhe një burrë me emrin Olivier.

Ministri i Jashtëm Séjourné deklaroi të enjten se qeveria është ende duke punuar për sigurimin e lirisë së këtyre të burgosurve. “Diplomacia jonë është ende e mobilizuar. Por sot duhet të jemi të kënaqur me këtë fitore të madhe diplomatike për Francën”, tha ai.

LEXO GJITHASHTU:

• Si do ndikojnë zgjedhjet në financat publike të Francës, ç’ndodh nëse fiton Le Pen
• Sondazhet në Francë: Aleatët e Macron frikë nga pasojat e zgjedhjeve të parakohshme