Kthimi i Trump “tremb” BE-në, Euro-deputetët: Do rindezë luftën tregtare

Fitorja dërrmuese e Trump në zgjedhjet primare republikane ngriti shqetësime në Evropë. Rikthimi eventual i tij në Shtëpinë e Bardhë ngre shqetësime për një luftë të re tregtare mes BE-së dhe Shteteve të Bashkuara, pas 4 vitesh të qeta nën administratën Biden. Nën drejtimin e Trump, Amerika vendosi taksa për shumë produkte evropiane, si çelikun dhe aluminin, të cilat janë pezulluar.

Tiziana Beghin, euro-deputete italiane, Lëvizja 5 Yjet deklaroi: “Nuk po flemë të qetë. Është e vërtetë që konteksti ka ndryshuar dhe transformuar shumë krahasuar me vitet e mëparshme, edhe në kontekstin e luftës dhe atë të destabilitetit botëror, që mund të sjellë në skenarë të rinj. Nga ana tjetër është po ashtu e vërtetë që edhe me këtë administratë, pavarësisht toneve më të sheshuara dhe zhvendosjes në kohë të problemeve, sidomos sa i takon çelikut dhe aluminit, nuk kemi parë një vend shumë bashkëpunues”.

Tregtia nuk është e vetmja çështje që shqetëson BE-në. Amerika ka qenë dhe donatori më i madh i armëve në Ukrainë në këto thuajse 2 vjet luftë. Por tani Uashingtoni nuk po bie dakord për fondet e reja, pavarësisht presionit të presidentit ukrainas. Nëse Trump fiton, Amerika mund të bëhet një aleat i pabesueshëm.

Ndërkohë që David McAllister, euro-deputet gjerman i PPE u shpreh:“Sfida më e madhe me zotin Trump është se ai është i paparashikueshëm. Nga njëra anë ka thënë se do të mbështesë Ukrainën për sa kohë të jetë e nevojshme dhe nga ana tjetër po vë në dyshim këtë mbështetje. Ai ka këndvështrime të ndryshme dhe ne nuk e dimë kurrë se cili është këndvështrimi i tij”.

Por ky është kapitulli i parë i një gare të gjatë. Pas fitores së bindshme në Ajoua, ish-presidenti duhet të caktohet si kandidat në mënyrë që të sfidojë Biden.

LEXONI GJITHASHTU:

• ‘Goditje’ për Trump, kandidati republikan del nga gara e primareve. Kush favorizohet
• A është imun nga ndjekja penale Trump? Gjykatësit e Apelit në SHBA japin qëndrimin