Ku do të gjenden 370 mln $? Ahmetaj: Riaolokim të shpenzimeve dhe rritje të deficitit

Në planin financiar prej 7 pikash për situatën e krijuar nga COVID-19, qeveria ka parashikuar një fond prej 370 milionë dollarë. Ministri i Rindërtimit, Arben Ahmetaj, i caktuar nga Kryeministri, Edi Rama, në krye të menaxhimit të planit thotë se këto para janë siguruar nga riaolokimi i shpenzimeve (rishikimi i buxhetit të shtetit) dhe zgjerimi fiskal (rritja e deficit).

Z. Ahmetaj gjatë intervistës për Euronews Albania theksoi se, plani financiar për COVID-19 do ta rrisë borxhin publik të Shqipëri, duke e çuar atë në nivelin 67% të prodhimit të brendshëm bruto.

“Ka dy mënyra për t’i gjetur dhe janë gjetur. Mënyra e parë është rialokimi i shpenzimeve siç ka ndodhur, mënyra e dytë është zgjerimi fiskal, në shembullin, traditën dhe nevojën e të gjitha vendeve që po kalojnë në të njëjtën situatë. Kemi rritur deficitin nga 2.2% në 3.9%. Arsyeja kryesore e rritjes së deficitit është rënia drastike e të ardhurave për shkak të ngadalësimit të ekonomisë që këtë muaj”, deklaroi ministri.

I pyetur nëse është i dëmshëm rritja e deficitit gati në 4% dhe pse si zgjidhje alternativë nuk janë prekur koncesionet, z. Ahmetaj la të kuptohej se po priten skenarë të tjerë për të ndërhyrë në këtë sektor. “Jo vetëm është e shëndetshme, por është e domosdoshme, sepse nuk ka rrugë tjetër. Praktikisht nuk ka rrugë tjetër”, tha ai.

Masat, nënvizoi z. Ahmetaj lidhen me ekonominë e brishtë të Shqipërisë dhe faktit se jemi një vend i varfër, pasi nuk mund të marrim masa të njëjta si ato që kanë nivel të lartë të prodhimit të brendshëm bruto. Në këtë pikë, ai tha se plani i ndihmës përmban mbi 2% të GDP-së.

Për muajin mars, z. Ahmetaj tha se sipas të dhënave të deritanishme mund të ketë një rënie prej 70 milionë dollarë të ardhurash të munguara për arkën e shtetit. Ndërsa për muajin prill, rënia e të ardhurve tha ai mund të shkojë deri në 120 milionë dollarë.

“Borxhi në dinamikë po shkoni diku tek pak më pak se 67%, por sigurisht kjo varet se çfarë trajektoreje rënëse do të marrë ekonomia”, deklaroi më tej ministri i Rindërtimit.