Ministri Barrot: Nuk do të ketë heqje të sanksioneve të OKB-së ndaj Iranit pa miratimin e Francës

Ministri i jashtëm francez, Jean-Noel Barrot deklaroi këtë të premte se Franca dëshiron të luajë një rol në bisedimet që kanë të bëjnë me programin bërthamor të Iranit dhe nuk do të miratojë heqjen e sanksioneve të OKB-së nëse nuk është e kënaqur me kushtet e një marrëveshjeje përfundimtare.

Sipas tij, nuk do të kishte stabilitet në rajon nëse bisedimet e SHBA-së me Iranin nuk do të trajtonin edhe programin e raketave balistike të Iranit dhe mbështetjen për palët e deleguara.

“Në këmbim të lëshimeve të mëdha që do t’i kërkohen Iranit është heqja e sanksioneve, sanksioneve që u vendosën në Kombet e Bashkuara”, tha ai.

“Franca është anëtare e përhershme e Kombeve të Bashkuara (Këshillit të Sigurimit), kështu që siç ishte rasti 10 vjet më parë, Franca do të duhet të japë miratimin e saj që sanksionet të hiqen”, shtoi ministry francez.

Marrëveshja e arritur midis Shteteve të Bashkuara dhe Iranit këtë javë parashikon që negociatat mbi programin bërthamor të Iranit të zhvillohen gjatë 60 ditëve të ardhshme, me një marrëveshje përfundimtare që duhet të miratohet nga Këshilli i Sigurimit.

Fuqitë evropiane kanë frikë se një ekip negociator i papërvojë i SHBA-së mund të dështojë në sigurimin e një marrëveshjeje të fortë bërthamore ose në adresimin e programit të raketave balistike të Iranit në fazën tjetër, duke rrezikuar një ngërç të zgjatur.

Franca, Britania dhe Gjermania duan një rol në formësimin e bisedimeve të ardhshme, pasi u lanë mënjanë në muajt e fundit.

Të tre vendet e angazhuan për herë të parë Iranin në programin e tij bërthamor në vitin 2003 dhe më vonë punuan me presidentin e atëhershëm të SHBA-së, Barack Obama, për të siguruar një marrëveshje të vitit 2015 për të frenuar programin bërthamor të Iranit në këmbim të lehtësimit të sanksioneve.