Kuka: Presidenca shqiptare refuzoi shtetësinë për xhudisten nga Kosova

Përmes një statusi në Facebook, trajneri i ekipit kosovar të xhudos, Driton Kuka ka zbuluar se presidenca shqiptare e ka refuzuar Laura Fazliu që të marrë nënshtetësinë e Shqipërisë.

Si pasojë e kësaj, para disa muajsh Laura nuk kishte pasur mundësi të udhëtonte me ekipin në Azerbajxhan për shkak të pasaportës, raporton KosovaPress.

Kuka tha se Presidenca e Shqipërisë e refuzoi për shtetësi shqiptare Fazliun, duke i cilësuar të mjerë ata që nuk e njohin një vajzë që po e bën kombin shqiptar krenar kudo në botë.

“Përkundër që nga Ministria Brendshme dhe Ministria e Arsimit dhe Sportit mori miratimin, ajo nga ekspertë të Presidencës Shqiptare u refuzua për shtetësi shqiptare! I mjerë ai që nuk e sheh një vajzë që po bën krenar çdo shqiptar kudo në botë që nuk qenka interes Kombëtar! Laura s’mundi të udhëtojë në Azerbajxhan për shkak të pasaportës muaj më parë! Faleminderit Qeverisë Shqiptare, por sinqerisht ‘ekspertët’ në Presidencë janë të mjerë”, shkroi Kuka në Facebook.

LEXONI GJITHASHTU:

• Medalja e tretë e Artë për Kosovën, triumfon xhudistja Loriana Kuka
• Xhudistja Distria Krasniqi fiton Medaljen e Artë në Lojërat Mesdhetare