Kurdët dorëzojnë armët, reagon presidenti turk Erdogan

Presidenti i Turqisë, Recep Tayyip Erdogan, deklaroi sot se shpreson që hapat e ndërmarrë për të ndërtuar një Turqi pa terrorizëm “do të sjellin rezultate pozitive”, pasi një grup militantësh të PKK-së dorëzuan armët në Irakun verior, raporton Anadolu Agency.

Në një postim në platformën sociale X, kreu i shtetit turk uroi “sukses nga Zoti në rrugën për të garantuar sigurinë e kombit tonë, paqen e popullit tonë dhe vendosjen e paqes së qëndrueshme në rajonin tonë”.

Sipas autoriteteve, grupi prej 30 militantësh të PKK-së, mes të cilëve 15 gra, dorëzoi armët dhe i shkatërroi ato duke i djegur në një kazan të madh në provincën Sulaymaniyah të Irakut verior.

Ky zhvillim vjen pas njoftimit të majit, kur organizata terroriste PKK shpalli shpërbërjen dhe dorëzimin e armëve. Më herët, në shkurt, udhëheqësi i burgosur i PKK-së, Abdullah Oçalan, kishte bërë thirrje për përfundimin e aktivitetit të armatosur që ka zgjatur mbi katër dekada.

PKK-ja, e shpallur organizatë terroriste nga Turqia, Shtetet e Bashkuara dhe Bashkimi Evropian, ka qenë përgjegjëse për vdekjen e më shumë se 40.000 njerëzve gjatë fushatës së saj 40-vjeçare, përfshirë gra, fëmijë dhe të moshuar.