Kurti në Stamboll, ja çfarë diskutoi me Erdoganin

Kryeministri i Kosovës, Albin Kurti është takuar në Stamboll me presidentin turk, Rexhep Taip Erdogan.

Kurti ka shprehur mirënjohjen për mbështetjen e pakursyer të Turqisë në çdo etapë të ndërtimit të shtetit të Kosovës.

Ai tha se me Erdoganin ka biseduar për raportet miqësore mes dy vendeve dhe mundësitë e reja të bashkëpunimit në rrafshin ekonomik, tregtar, të sigurisë dhe mbrojtjes.

“Me ftesë të presidentit të Republikës së Turqisë, z. Rexhep Taip Erdogan, sot bashkë me ministrin e Kulturës, Rinisë dhe Sportit, Hajrulla Çeku, ambasadorin e Kosovës në Turqi, Agon Vrenezi dhe ish Kryetarin e Komunës së Prizrenit, Mytaher Haskuka ishim në një vizitë pune në qytetin historik të Stambollit. Përgjatë takimit dhe darkës së punës biseduam për raportet tona miqësore dhe për mënyrat sesi mund t’i thellojmë e forcojmë ato.

Diskutuam edhe për mundësitë e reja të bashkëpunimit në rrafshin ekonomik e tregtar dhe të sigurisë e mbrojtjes. I jemi përherë mirënjohës Turqisë për mbështetjen e pakursyer në çdo etapë të ndërtimit të shtetit tonë e shumë fusha të zhvillimit të tij. Presidentin Erdogan e falënderova për mikpritjen e përzemërt dhe për përkrahjen e zëshme të Turqisë për anëtarësimin e Kosovës në NATO dhe Këshillin e Evropës”, shkroi Kurti në Facebook.

LEXONI GJITHASHTU

• “As mos të të shkojë ndërmend”, Vuçiç paralajmëron deputetin shqiptar në Serbi
• Kuvendi i Serbisë miraton raportin për procesin e negociatave me Kosovën
• “Turqia ofron mbështetje për paqen në Ballkan”, Kurti takon Erdoganin