Kurti paralajmëron miratimin e ligjit për dhunën pas vdekjes së 18-vjeçares

Gjykata themelore e Ferizaj ka vendosur që Dardan Krivaqa, i akuzuar për vrasjen e 18-vjeçares Marigona Osmani në Ferizaj, të rrijë një muaj në paraburgim si masë sigurie. E njëjta masë sigurisë është dhënë edhe për Arbër Sejdiun, shokun e Krivaqës, i cili dyshohet se ka ushtruar dhunë ndaj viktimës.

Që të dy rinjtë e braktisën 18-vjeçaren pa jetë në urgjencën e Ferizaj, pasi e kishin keqtrajtuar për gati 24 orë.

Sipas hetimeve të prokurorisë, mësohet se krimi ka ndodhur për shkak të xhelozisë. Për krivaqën, i cili ka qenë edhe më parë i dyshuar për përfshirje në çështje të rënda deri në vrasje, prokuroria tashmë duket se e ka kopsitur dosjen.

Për ngjarjen, ka reaguar edhe kryeministri Albin Kurti, i cili mori pjesë në ceremoninë mortore të 18-vjeçares, nga ku edhe u shpreh se qeveria ka gati ligjin në ndihmë të grave e vajzave të dhunuara.

E ndërkohë që në varrezat e Ferizajt zhvillohej ceremonia mortore për 18-vjeçaren Marigona Osmani, në shesh protestohej për ngjarjen e rëndë dhe për rastet e përsëritura të dhunës, ku viktima janë gratë.

Duke kërkuar dënim maksimal për të ndaluarit, protestuesit kanë hedhur ngjyrë të kuqe dhe vezë në drejtim të Stacionit Policor, Gjykatës dhe Prokurorisë.

Bjeshkë Guri nga Qendra Kosovare për Studime Gjinore u shpreh se me rastin e Marigonës, po vërtetohet neglizhenca e institucioneve ligjzbatuese.