Kush do ta qeverisë Sirinë? Reagime nga liderët botërorë pas rënies së Assad

Pas lajmit se në Siri ra regjimi i Assad, të menjëhershme kanë qenë edhe reagimet nga liderët botërorë.

Rusia një mbështetëse e fortë e Bashar al Assad  bëri me dije se presidenti u largua, por këmbënguli se nuk ishte e përfshirë në negociata dhe se bazat e saj ushtarake në Siri janë të gatishmëri të lartë.

Presidenti turk Rexhep Tajip Erdogan u shpreh se tashmë në Sirinë fqinje “ka një realitet të ri”

“Ka një realitet të ri në Siri, politikisht dhe diplomatikisht. Siria i përket sirianëve të të gjitha etnive, ndarjeve dhe elementeve fetare”, u shpreh  Erdogan duke folur në qytetin jugor turk Gaziantep.

‘Më në fund shteti barbar ra’ shkroi në rrjetet sociale presidenti francez Macron.

Lajm të mirë e cilësoi rënien e Assad edhe kancelari gjerman Olaf Scholz dhe bëri thirrje se duhet në zgjidhje politike për të sjellë stabilitet në Siri.

Shefja e re e diplomacisë europiane Kaja Kallas u shpreh se rënia e diktaturës së ASSAD është një zhvillim pozitiv, dhe se tregon dobësinë e mbështetësve të tij Rusisë dhe Iranit.

Ndërsa rebelët sirianë po i afroheshin Damaskut nga veriu dhe jugu, presidenti i zgjedhur amerikan Donald Trump bëri reagimin e parë.

Përmes një reagimi në rrjetet sociale, Trump thotë se Shtetet e Bashkuara nuk duhet “të përfshihen” në situatën e krijuar në Siri.

“Shtetet e Bashkuara nuk duhet të bëjnë asgjë. Kjo nuk është lufta jona. Mos u përfshini”

Kina po ashtu reagoi duke theksuar se po e monitoron me vëmendje situatën në Siri dhe shpreson që në vend të kthehet stabiliteti.

LEXONI GJITHASHTU:

• “E kemi rrëzuar presidentin Assad”, rebelët sirianë deklaratë në “TV Shtetëror”
• Rebelët sirianë pushtojnë Damaskun dhe fillojnë festimet: Assad ka ikur