Kushte të reja për hapjen e negociatave? PE caktoi kriteret për Shqipërinë

Raporti i miratuar në Parlamentin Evropain për Shqipërinë nuk cakton 15 kushte për vendin tonë për hapjen e negociatave, por janë kriteret që duhen plotësuar gjatë procesit të anëtarësimit në BE.

Korrespondenti i Euronews Albania, Ernest Bunguri thotë se, bëhet fjalë për prioritetet e Shqipërisë që do të mbeten gjatë si kërkesa për t’u plotësuar pasi në thelb është përafrimi i legjislacionit shqiptar me atë të BE-së.

“Bëhet fjalë për procese që do të vijojnë gjatë, pasi po t’i marrim një nga një dalin që janë 200 apo 2 mijë kushte. Prandaj janë vendosur dhe afate pasi bëhet fjalë për të gjithë procesin e negociatave për hyrjen në BE”, u shpreh Bunguri.

Komisioni Evropian gjithashtu ka bërë një sqarim lidhur me kushtet e vendit tonë para mbajtjes së konferencës së parë ndërqeveritare mes Shqipërisë dhe Bashkimit Evropian.

Ana Pisonero, zëdhënësja e Komisionit Evropian për Zgjerim, ka bërë të ditur për Euronews Albania se kushtet janë: miratimin e reformës zgjedhore; garantimi i financimit transparent të partive politike dhe fushatave zgjedhore; garantimi i vijimit të zbatimit të reformës në drejtësi.

Ndërsa pjesa e tjetër e kërkesave lidhet me kuadrin negociues dhe nga vendi kërkohet që ato të plotësohen gjatë procesit të negociatave.