Kuvendi i kërkon Prokurorisë së Përgjithshme të rrisë efektivitetin e luftës kundër kriminalitetit

Kuvendi i kërkon Prokurorisë së Përgjithshme të rrisë efektivitetin e luftës kundër kriminalitetit

Kuvendi i Shqipërisë ka bërë gati një projekt-rezolutë ku i kërkon prokurorisë së përgjithshme të rrisë efektivitetin e luftës kundër kriminalitetit.

Bazuar në raportimin e kryeprokurorit Olsian Çela, Kuvendi ka arritur në përfundimin se është ulur koeficienti i kriminalitetit në vend, nga 1094 vepra për 100 mijë banorë për vitin 2018 në 1072 vepra për 100 mijë banorë.

Megjithatë, lidhur me efektivitetin e ndjekjes penale, në krahasim me 2018, rezulton ulje e numrit të çështjeve të përfunduara me 7,95 %, të çështjeve të dërguara në gjykatë me 11,82 % dhe numri i të pandehurve dërguar në gjykatë është ulur me 9, 29 %.

Kuvendi kërkon nga Prokuroria e Përgjithshme të rrisë bashkëpunimin me Prokurorinë e Posaçme SPAK dhe me institucione të tjera për të përmirësuar cilësinë e ndjekjes penale dhe të luftojë pastrimin e parave

Për të siguruar mbarëvajtjen e punës nëpër prokuroritë e rretheve, kërkohet që të rritet bashkëpunimi me Shkollën e Magjistraturës dhe Këshillit të Lartë të Prokurorisë.

Po ashtu, Prokuroria duhet të unifikojë politikën penale dhe hetimin e veprave penale në familje, kundër fëmijëve dhe grave dhe krimeve me motive të urrejtjes, bazuar në standardet me të mira ndërkombëtare.

 Kuvendi gjithashtu kërkon që t’i kushtohet vëmendje e veçantë viktimave dhe mbrojtjes së tyre gjatë procedimit penal deri në përfundimin e procesit gjyqësor.

Lidhur me metodikën e punës, Kuvendi kërkon që prokurorët të fillojnë të njohin më mirë zbatimin e urdhrit penal, marrëveshjen e fajësisë dhe gjykimin e drejtpërdrejtë Në projekt-rezolutë theksohet që prokuroria duhet t’i kushtojë më shumë kujdes zbatimit të dënimeve alternative dhe respektimit të procedurave të ekzekutimit të vendimeve penale