Kuvendi rrëzoi kërkesën e SPAK për arrestimin e Ballukut, reagon për Euronews delegacioni i BE

Delegacioni i Bashkimit Evropian në vendin tonë reagoi pas rrëzimit të kërkesës së SPAK për heqjen e imunitetit të Belinda Balluku nga Kuvendi i Shqipërisë të enjten.

I pyetur nga Euronews Albania, Delegacioni i BE shprehet se “sigurimi i një mjedisi të përshtatshëm që SPAK të kryejë në mënyrë efektive punën e tij është thelbësor për të mbështetur në mënyrë të besueshme progresin e Shqipërisë drejt anëtarësimit në Bashkimin Evropian”.

“Bashkimi Evropian është në dijeni të rezultatit të votimit të sotëm në Parlamentin e Shqipërisë.

Angazhimi ndaj shtetit të së drejtës dhe lufta kundër korrupsionit janë të një rëndësie thelbësore për procesin e anëtarësimit në BE.

Sigurimi i një mjedisi të përshtatshëm që SPAK të kryejë në mënyrë efektive punën e tij është thelbësor për të mbështetur në mënyrë të besueshme progresin e Shqipërisë drejt anëtarësimit në Bashkimin Evropian”, thuhet në reagimin e BE për Euronews Albania.