Kuvendi tërhiqet nga vendimi që ndalonte gazetarët në mbledhjet e komisioneve

Kuvendi i Shqipërisë ka vendosur të tërhiqet nga vendimi për moslejimin e gazetarëve që të ndjekin aktivitetet e komisioneve parlamentare.

Në një dokument të firmosur nga kryeparlamentari Gramoz Ruçi, drejtuar Byrosë së Kuvendit, thuhet se janë pranuar 5 kërkesat e shoqatave të gazetarëve për mënyrën sesi duhet të funksionojnë marrëdhëniet me mediat.

Në këtë mënyrë, Kuvendi do të lejojë praninë fizike të gazetarëve dhe kameramanëve në komisionet parlamentare.

Gjithashtu, Kuvendi është tërhequr dhe nga pika që sugjeronte shoqërimin e gazetarëve brenda ambienteve të institucionit me personel të gardës.

Kuvendi ka pranuar dhe pikën për të lejuar përdorimin e telefonave celularë nga gazetarët, ndërkohë për intervistat do të përdoret vetëm dhoma e veçantë për mediat.

Disa javë më parë, Kuvendi vendosi rregulla të reja për mediat duke hequr të drejtën e filmimeve direkte për mediat, por marrjen e tyre vetëm nga një zyrë e veçantë. Vendimi solli reagime të forta të gazetarëve dhe shoqatave të mediave.

LEXONI GJITHASHTU: 

• Kundërshtohet vendimi i Kuvendit, gazetaret në protestë për moslejimin gjatë mbledhjeve të komisioneve