La Liga dhe Serie-A, Atletico ndal Barcelonën, Juventus rinis marshimin në krye

Në javën e 29-të të kampionatit spanjoll, Barcelona nuk arriti të marrë më shumë se një barazim 2-2 ndaj Atletico de Madrid duke humbur kështu edhe më tepër pikë në duelin për titullin kampion me Realin.

Edhe pse skuadra e Quique Setien kaloi e para në avantazh falë një autogoli të Diego Costas, nuk mundi ta administrojë rezultatin, pasi u barazua nga Saul.

Vlen të theksohet se në këtë ndeshje u dhanë 3 penallti, një për Barcelonën dhe dy për Atleticon. Të dyja të madrilenëve i realizoi Saul.

Por edhe pse për Barcelonën nuk ishte ndeshje e mirë, e veçantë mbrëmja e së martës ishte për kapitenin Lionel Messi, i cili me golin e shënuar nga njëmbëdhjetëmetërshi arriti kuotën e 700 golave në karrierë.

Barazimi 2-2 me Atleticon u kushton katalanasve vendin e parë, pasi Reali i Madridit largohet me 1 pikë më shumë në krye.

Ndërkohë në kampionatin italian Juventus me sa duket e ka rigjetur ritmin që i mungonte. Bardhezinjtë fituan 3-1 transfertën me Genoan, një ndeshje që pa të katër golat të shënoheshin në pjesën e dytë.

Dybala, Ronaldo dhe Daglas Costa ishin autorët e golave për bardhezinjtë.

Pas këtij suksesi diferenca me Lazion e vendit të dytë shkon sërish në 4 pikë.

Për sa u përket bardhekaltrve, ata fituan me përmbysje 2-1 tansfertën me Torinon.

I përhershmi Immobile dhe më pas Parolo zhbënë penalltinë e Belottit që kishte realizuar në pjesën e parë.

Immobile mbetet golashënues i Serie-A me 29 gola, 5 më shumë se Cristiano Ronaldo.

Lazio vuan ndjeshëm humbjen me Atalantën, e cila i mban ata larg ëndrrës për t’u rikthyer te titulli pas rreth 20 vitesh.

Lexoni gjithashtu:

Bayern paguan 45 milionë euro, Sané largohet nga Manchester City

Clemens Tönnies dorëhiqet si president i Schalke 04

Kupa e Afrikës shtyhet për në vitin 2022, anulohet formati i vajzave