Lavrov: Rajonet pro-ruse të Ukrainës të marrin në dorë fatin e tyre

Kundërsulmi i suksesshëm i ushtrisë ukrainase ka bërë që Kremlini të përshpejtojë planet për të aneksuar territoret e kontrolluara nga trupat e tij.

Të martën, krerët e administratave pro-ruse të rajoneve të pushtuara të Khersonit dhe Zaporizhias njoftuan mbajtjen e menjëhershme të një referendumi për bashkimin me Rusinë.

Sikurse në Luhansk dhe Donjeck, në Kherson referendumi do të mbahet mes datave 23 dhe 27 shtator. Ministri i Jashtëm rus, Sergey Lavrov reagoi menjëherë.

“Që në fillim të operacionit special ushtarak dhe në periudhën që i parapriu atij, ne e thamë se njerëzit e territoreve në fjalë duhet të vendosin vetë për fatin e tyre. Dhe situata aktuale atje konfirmon se ata duan të jenë padronë të fatit të tyre”, tha ai.

Ukraina, që në dy javët e fundit ka rifituar sipërfaqe të konsiderueshme territori, i konsideron lëvizjet e Moskës si një tregues të dëshpërimit të saj, teksa sheh ushtarët që po arratisen në mënyrë kaotike që nga fillimi i kundërofensivës ukrainase.

Një këshilltar i presidentit Zelensky deklaroi se zërat për aneksim janë një lloj “qetësuesi” për qytetarët rusë, të cilët po e kuptojnë se po e humbasin luftën.

Ndërkohë, në Izjum vijojnë hetime për krimet e mundshme të luftës të kryera nga trupat ruse. Në një pyll pranë qytetit të çliruar së fundmi janë gjetur 450 varre dhe shumë trupa të pajetë me shenja torture.

LEXONI GJITHASHTU

• Putin: Rusia do të mbrojë sovranitetin e Serbisë

• Putini më ka thënë se është i gatshëm t’i japë fund luftës, thotë Erdogan
• Putin do gëzohej nëse do kishte konflikt në Ballkan, thotë Rama