Doganierët belgë konfiskuan tre lepurushë prej “çokollate” në aeroportin Zaventem të Brukselit, pasi analizat përcaktuan se ishin bërë nga droga e njohur si ekstazi.

Dërgesa është deklaruar si një suvenir me një vlerë totale prej 145.2 euro, raporton Brussels Times.

“Ajo që në fillim dukej si një ccokollatw e shijshme për fëmijët, pas analizave doli të ishte MDMA e pastër, e destinuar për prodhimin e tabletave ekstazi”, tha zëdhënësi i Shërbimit Publik Federal për Financat, Francis Adins.

Ai tha se nuk mund të përcaktohet vlera e tregut të produktit, por se në çdo rast malli i konfiskuar do të asgjësohet.

Pakoja prej 1.8 kilogramësh u kap në zyrën postare në aeroport duke përdorur një spektroskop Raman, një skaner dore që mund të identifikojë substancat nga gjurmët e tyre kimike.

Pakoja është dërguar nga një adresë në Belgjikë, e cila rezultoi se nuk ekzistonte.

Porti kryesor i Belgjikës, Antwerp, po bëhet gjithnjë e më shumë porta e Evropës për kontrabandën e drogës nga Amerika Latine për shkak të vendndodhjes së saj gjeografike, por vetë vendi është bërë një qendër për drogat sintetike që prodhohen në Evropë dhe më pas dërgohen nëpër botë.

LEXONI GJITHASHTU:

• Goditet banda e trafikut të drogës në Greqi, 7 persona në pranga, mes tyre shqiptari
• Njerëzit merrnin drogë në Spanjë 3000 vjet më parë