Letonia mbështet anëtarësimin e Kosovës në NATO dhe KE

Letonia mbështet anëtarësimin e Kosovës në NATO dhe në Këshillin e Evropës.

Këtë e deklaroi presidenti i Letonisë, Egils Levits duke shprehur gatishmëri për të mbështetur Kosovën në rrugën euroatlantike.

Në një konferencë të përbashkët me presidenten e Kosovës Vjosa Osmani të premten, ai tha se tani është koha e duhur për fuqizimin e bashkëpunimit mes Kosovës dhe NATO-s.

Presidenti letonez tha se mbështet anëtarësimin e Kosovës në Këshill të Evropës dhe kërkoi nga BE-ja liberalizimin e vizave për qytetarët e Kosovës.

Ndërkohë, theksoi se mungesa e progresit në dialogun Kosovë-Serbi nuk duhet të kufizojë konsolidimin e Kosovës në arenën ndërkombëtare.

“Është e rëndësishme që të fuqizojmë bashkëpunimin mes Kosovës dhe NATO-s. Si hap i parë së paku është e domosdoshme që Kosova t’i bashkohet partneritetit për paqe dhe mendoj se tani është koha e duhur për të bërë këtë hap të mirë. Varet nga NATO, pasi ajo është që do të vendosë rreth kësaj. Është shumë e rëndësishme që fuqizohet bashkëpunimi për kyçje të Kosovës në NATO. Letonia është duke e përkrahur këtë hap”, tha ai.

Mes tjerash, ai tha se Kosova i përket Evropës dhe duhet të bëhet integrimi i plotë i saj në të gjitha mekanizmat evropiane. Ndërkohë theksoi se për integrim në BE, gjitha shtetet aspiruese duhet t’iu përshtaten politikave të BE-së.

LEXONI GJITHASHTU:

• Kosova duhet të anëtarësohet sa më shpejt në NATO, thotë senatori amerikan