Liderët e Armenisë dhe Azerbajxhanit takohen në Pragë me ndërmjetësimin e BE

Këshilli Evropian tha se liderët e Armenisë dhe Azerbajxhanit janë takuar në samitin e Pragës dhe kanë rënë dakord për një mision civil të BE-së në kufirin e tyre të përbashkët.

Në përleshjet e muajit të kaluar mes dy vendeve, janë vrarë më shumë se 200 persona, përleshjet më vdekjeprurëse qëkur Armenia dhe Azerbajxhani zhvilluan një luftë gjashtëjavore më 2020 mbi rajonin e shkëputur të Nagorno-Karabakut.

Këshilli tha në një deklaratë, më 7 tetor, se kryeministri i Armenisë, Nikol Pashinian dhe presidenti i Azerbajxhanit, Ilham Aliyev u takuan në prani të presidentit të Këshillit të BE-së, Charles Michel dhe presidentit francez, Emmanuel Macron në margjinat e mbledhjes së parë të Bashkësisë Politike Evropiane.

Pashinian u pajtua të “lehtësojë një mision civil të BE-së përgjatë kufirit me Azerbajxhanin”, thuhet në deklaratë. Ndërsa Azerbajxhani “ra dakord të bashkëpunojë me këtë mision”.

LEXONI GJITHASHTU:

• 105 ushtarë janë vrarë në luftimet me Azerbajxhanin, thotë Armenia
• Dhuna në Nagorno Karabak, Armenia kërkon ndihmën e ndërkombëtarëve