Liderët e BE-së deklaratë: Kufijtë e Ukrainës nuk duhet të ndryshohen me forcë

Udhëheqësit evropianë kanë paralajmëruar kundër ripërcaktimit me forcë të kufijve të Ukrainës, tre ditë para se Vladimir Putin i Rusisë dhe Presidenti i SHBA-së Donald Trump të zhvillojnë një samit mbi Ukrainën në Alaska.

Në një deklaratë, udhëheqësit evropianë thanë se “populli i Ukrainës duhet të ketë lirinë për të vendosur të ardhmen e tij”.

Në deklaratë shtohet se parimet e “integritetit territorial” duhet të respektohen dhe “kufijtë ndërkombëtarë nuk duhet të ndryshohen me forcë”.

Deklarata u nënshkrua nga 26 nga 27 udhëheqës. Midis nënshkruesve mungonte udhëheqësi i Hungarisë, Viktor Orban, i cili ka ruajtur marrëdhënie miqësore me Rusinë dhe është përpjekur vazhdimisht të bllokojë mbështetjen e Bashkimit Evropian për Ukrainën.

Deklarata nënvizoi nervozizmin që ndiejnë evropianët në lidhje me veprimet e Moskës në Ukrainë, të cilat shumë vende – veçanërisht ato që kufizohen me Rusinë ose ato në të cilat kujtimi i pushtimit sovjetik ende mbetet – besojnë se mund të përbëjnë një kërcënim të drejtpërdrejtë në të ardhmen e afërt.

Në vitet e fundit, Suedia dhe Finlanda i janë bashkuar NATO-s, vendet baltike kanë rivendosur rekrutimin ushtarak dhe Polonia ka ndarë miliarda dollarë për të ndërtuar një barrierë përgjatë kufirit të saj me Rusinë.

Vendet evropiane kanë një histori të gjatë të rivizatimit të kufijve nga luftërat e përgjakshme dhe janë jashtëzakonisht të shqetësuara nga mundësia që SHBA-të të lejojnë që kjo të ndodhë në Ukrainë. Një njohje ligjore e sovranitetit të Rusisë mbi territoret e pushtuara me forcë është e papranueshme për BE-në.

LEXONI GJITHASHTU:

• Macron: E ardhmja e Ukrainës nuk mund të vendoset pa ukrainasit
• SHBA, BE dhe zyrtarë ukrainas takohen sot në Britani