Liderët e BE-së zotohen për vazhdimin e ndihmës ushtarake për Ukrainën

Samiti dyditor i liderëve të Bashkimit Evropian u dominua nga bisedimet për luftën në Ukrainë dhe forcimin e mbrojtjeve.

Samiti përfundoi mesnatën e 29-30 qershorit me një deklaratë të përbashkët të liderëve, të cilët përsëritën zotimet “për të ofruar mbështetje të qëndrueshme ushtarake për Ukrainën, për aq kohë sa të jetë e nevojshme”.

Liderët e bllokut prej 27 shtetesh thanë gjithashtu se “jemi të gatshëm të kontribuojmë, së bashku me partnerët, për zotimet e ardhshme të sigurisë për Ukrainën, që do të ndihmojnë Ukrainën të mbrojë veten në periudhë afatgjatë, të pengojë aktet e agresionit dhe t’u rezistojë përpjekjeve destabilizuese”.

Shumica e anëtarëve të BE-së janë gjithashtu anëtarë të NATO-s dhe aleanca transatlantike pritet të kërkojë mënyra për t’i ofruar Ukrainës garanci shtesë të sigurisë, por nuk pritet t’i ofrojë Kievit anëtarësim të plotë në aleancë gjatë samitit të NATO-s më 11 dhe 12 korrik.

Sekretari i përgjithshëm i NATO-s, Jens Stoltenberg, iu bashkua samitit të BE-së dhe vuri në pah dobësitë e perceptuara të udhëheqjes në Rusi, të cilat u shfaqën gjatë rebelimit të 24 qershorit të liderit të Wagner-it, Yevgeny Prigozhin, dhe mijëra mercenarëve të tij.

LEXONI GJITHASHTU:

• “Xhelozia, kripa e dashurisë”- Tupja tregon pse u tërhoq nga libri “Macja”
• Hovenier: Qeveria e Kosovës po na habitë, por refuzon kërkesat e miqve të saj