Lideri Suprem i Iranit evakuohet në bunkerin e sigurt në Teheran

Udhëheqësi suprem i Iranit, Ayatollah Ali Khamenei, është evakuuar në një bunker nëntokësor në verilindje të Teheranit, vetëm pak orë pas nisjes së sulmeve ajrore nga Izraeli, raportoi të premten Iran International, duke cituar dy burime të informuara brenda vendit.

Sipas raportimeve, Khamenei dhe anëtarët e familjes së tij janë strehuar në kompleksin në zonën Lavizan, një strukturë e mbrojtur që përdoret në raste emergjente. Kjo nuk është hera e parë që udhëheqësi suprem evakuohet në këtë vend: ai thuhet se ka qëndruar atje edhe gjatë sulmeve të mëparshme iraniane ndaj Izraelit në prill dhe tetor të vitit 2024.

Ndërkohë, një burim diplomatik nga Lindja e Mesme ka pohuar për Iran International se Izraeli ka shmangur me qëllim goditjen direkte ndaj Khameneit gjatë natës së parë të operacionit ushtarak, duke i dhënë, sipas burimit, një “mundësi të fundit” për të hequr dorë nga programi i pasurimit të uraniumit.

Tensionet mes dy vendeve kanë njohur një përshkallëzim të ndjeshëm ditët e fundit, me goditje strategjike me raketa nga të dyja palët.

LEXONI GJITHASHTU:

• Kush ishin katër gjeneralët iranianë të vrarë në sulmin izraelit?
• Rriten çmimet e naftës pas sulmeve të Izraelit ndaj Iranit, “tronditen” tregjet