Ligji nën presion, si Trump po shkund themelet e ndihmës falas ligjore në SHBA

Pas rikthimit të Donald Trump në Shtëpinë e Bardhë, shumë firma të mëdha ligjore në SHBA janë tërhequr nga ndihma pro bono për grupe të pambrojtura, nga frika e hakmarrjes politike.

Trump ka lëshuar urdhra ekzekutivë që kritikojnë firmat që merren me çështje si emigracioni, të drejtat e transgjinorëve dhe hetimet për 6 janarin. Kjo ka shkaktuar një efekt frikësues te “Big Law”, duke ndikuar në refuzimin e ndihmës për organizatat që zakonisht mbështeten tek avokatët falas.

Disa firma madje kanë arritur marrëveshje me administratën për të ofruar ndihmë ligjore në përputhje me prioritetet e Trump, si shërbimi ndaj veteranëve apo lufta kundër antisemitizmit. Ndërkohë, shumë organizata për të drejtat civile raportojnë se nuk po gjejnë më përfaqësim, ose po përballen me kushte të pazakonta si mbajtja e ndihmës ligjore të fshehtë.

Analizat tregojnë se paditë kundër qeverisë federale nga firmat elitare janë përgjysmuar në krahasim me mandatin e parë të Trump. Termat “diversitet”, “drejtësi racore” dhe “emigracion” janë hequr nga shumë faqe zyrtare të firmave.

Presioni nuk është vetëm për të mos kundërshtuar qeverinë, por edhe për të mbështetur aktivisht axhendën e saj ligjore konservatore.

Kjo rrezikon të përmbysë një nga parimet bazë të profesionit ligjor amerikan, detyrimi për të ndihmuar ata që nuk mund të paguajnë. Në këtë klimë të re politike, ndihma ligjore falas po transformohet nga mjet drejtësie në instrument presioni.

LEXONI GJITHASHTU: 

• Trump kërkon dorëzimin e Hamasit: Mënyra më e shpejtë për t’i dhënë fund krizës

• Rekord botëror: Foshnja lind nga një embrion i ngrirë përpara 30 vjetësh