Ligjshmëria e zgjedhjeve lokale, Kushtetuesja do t’i drejtohet Komisionit të Venecias

Pas një seance maratonë, Gjykata Kushtetuese vendosi sot të pezullojë gjykimin për padinë e Voltana Ademit për zgjedhjet lokale të 30 qershorit.

Tashmë Gjykata Kushtetuese pritet t’i drejtohet Komisionit të Venecias për opinion dhe më pas do të japë një vendim për padinë e Ademit, e cila në cilësinë e kryetares së Shoqatës së Bashkive ka kërkuar që zgjedhjet vendore të 2019 të shpallen të pavlefshme.

Të gjitha palët në gjykim kanë të drejtë të depozitojnë deri më 25 qershor vetëm nga një pyetje për Komisionin e Venecias.

Pas kësaj, Gjykata Kushtetuese thekson se do t’i drejtohet Venecias me pyetjen e saj dhe të palëve për të marrë përgjigjet dhe argumentet në lidhje me këtë çështje, e cila ka shkaktuar debate të ashpra në sferën politike.

Vendimin e Gjykatës Kushtetuese për t’iu drejtuar Venecias e ka përshëndetur edhe znj. Ademi, e cila beson se Kushtetuesja do të japë një vendim të drejtë, që do mbrojë interesin e qytetarëve dhe rendin demokratik.

“Kam bindje që GJK do të japë drejtësi për të drejtat e qytetarëve, drejtësi kushtetuese, drejtësi për pluralizëm, drejtësi për shtet dhe pushtet pluralist, drejtësi për çdo institucion aktor dhe faktor që kanë detyrim të zbatojnë Kushtetutën dhe vetëm Kushtetutën”, shkruan mes tjerash Ademi.

Kjo nuk është hera e parë që institucionet shqiptare kërkojnë ndihmën e Komisionit të Venecias për të zgjidhur mosmarrëveshjet mes tyre.

LEXONI GJITHASHTU: 

• Gjykata Kushtetuese vendos të shqyrtojë zgjedhjet e 30 qershorit 2019