Ligjvënësit kërkesë Trump: Shfuqizo urdhrin për ndërprerjen e fondeve për mediat

Dhjetëra ligjvënës amerikanë më 25 mars i bënë thirrje presidentit Donald Trump, që të shfuqizojë urdhrin për të mbyllur Agjencinë e Shteteve të Bashkuara për Media Globale (USAGM), duke argumentuar se ky hap do të kishte një ndikim të dëmshëm mbi transmetuesit, përfshirë Radion Evropa e Lirë, dhe do të ndihmonte vetëm kundërshtarët e Uashingtonit, sikurse Rusia, Kina, Irani dhe Koreja e Veriut.

Në një letër drejtuar Trumpit, të nënshkruar nga më shumë se 40 anëtarë të Kongresit, u tha se mbyllja e USAGM-it do të dëmtonte edhe besueshmërinë e SHBA-së dhe pozicionin e saj global.

“Kjo do t’i lërë miliona njerëz në mjedise të mbyllura dhe shtypëse – nga Havana në Karakas, nga Minsku në Teheran – me më pak mundësi për të pasur qasje në informacion mbi botën që i rrethon”, u tha në letër.

“Ne u bëjmë thirrje që të shfuqizoni urdhrin ekzekutiv dhe të siguroni vazhdimin e punës jetike të Agjencisë së SHBA-së për Media Globale dhe transmetuesve të saj”.

Përfaqësuesi Bill Keating (demokrat nga Masaçusets), anëtar i nënkomitetit për Evropën në Komitetin për Punë të Jashtme në Dhomën e Përfaqësuesve, tha se REL-i, Zëri i Amerikës, Radio Azia e Lirë dhe media të tjera që mbikëqyren nga USAGM, “shërbejnë si mjete vitale të fuqisë së butë” që u mundësojnë njerëzve në shoqëri të mbyllura të kenë qasje në informacioneve të besueshme dhe objektive.

“Puna e tyre është aq e fuqishme saqë regjimet në Iran, Rusi dhe Kinë e kanë cilësuar atë si një kërcënim për sigurinë kombëtare”, tha Keating në një deklaratë për media, ku e cilësoi urdhrin ekzekutiv të Trumpit të 14 marsit si “të pamatur” dhe tha se ai “trimëron kundërshtarët e SHBA-së të cilët ndihen të kërcënuar nga mediat e besueshme”.

Në letër u tha se rrjetet dhe përfituesit e fondeve të USAGM-it luajnë një rol historik dhe të rëndësishëm për ofrimin e një mbulimi të drejtë dhe gjithëpërfshirës të lajmeve në shtetet që nuk kanë një mjedis mediatik të lirë ose të hapur.

LEXONI GJITHASHTU:

• Putin: Trupat ukrainase po largohen nga Kursku duke shkatërruar kishat
• Zëdhënësi i Kremlinit: Trump ka marrë një dhuratë shumë personale nga Putin