Lista e PD për Tiranën, voton Basha: Jemi shembull për gjithë rajonin, demokracia nis nga brenda shtëpisë

Kryetari i Partisë Demokratike, Lulzim Basha votoi sot për zgjedhjet e brendshme në parti, ku anëtarësia zgjedh kandidatët për deputetë të qarkut të Tiranës në listën me 140 emra të propozuar.

Në një deklaratë për mediat pasi votoi në njësinë 8, kryedemokrati tha se kjo sipërmarrje e PD është një risi jo vetëm në vend, por në gjithë rajonin dhe shprehja më e mirë e faktit se demokracia nis nga shtëpia.

“Pjesëmarrja masive e demokratëve në këtë proces është tregues i pjekurisë politike dhe vendosmërinë tonë që të bëjmë sot realitet brenda radhëve tona atë që do të bëjmë nesër për shqiptarët. Shqiptarët duan dhe presin ndryshim, dhe ndryshim vjen nga vota”, tha kryedemokrati.

Z. Basha tha se procesi i përfshirjes së anëtarësisë në evidentimin e kandidatëve demokratë që nesër do të jenë në parlament është shprehje e demokracisë në këtë parti dhe objekti që nesër në qeveri të dëgjohet zëri i çdo qytetari.

“Procesi i përfshirjes së anëtarësisë në evidentimin e kandidatëve, demokratizimi i PD do të jetë nesër objekti ynë në mënyrë që zëri i çdo shqiptari të ketë peshën e vet dhe qeveria të mos i shërbejë interesave të caktuar të një grushti njerëzish që janë pasuruar nga një qeveri që nuk ka dalë nga vota, por një qeveri nga e cila të përfitojnë të gjithë shqiptarët”, tha kreu i PD.

Lexoni gjithashtu:

Artistë, sportistë e gazetarë, PD e Tiranës voton sot listën e kandidatëve për deputetë në zgjedhjet e 25 prillit