Asambleja e PS, Rama: Na duhet mandati i tretë jo për vete, por për Shqipërinë

Partia Socialiste mbajti sot në Amfiteatrin e Parkut të Liqenit në Tiranë Asamblenë Kombëtare. Kryetari i PS-së, Edi Rama, u shpreh se socialistët kërkojnë një mandat të tretë për të qeverisur vendin, si shpërblim për punën e bërë në këto shtatë vite.

“Tanimë, kur bëhen shtatë vjet nga dita kur ne morëm detyrën, mund të thuhet me plot gojën se jemi në kushtet kur e keqja më e madhe është harruar, ose duhet kujtuar ose rikujtuar, sepse dita kur ne e nisëm këtë rrugëtim nuk ka as asgjë të ngjashme me ditën ku jemi sot”, shtoi ai.

Ai shtoi se qeveria shqiptare ka rritur pagat e mjekëve dhe mësuesve, si asnjë vend tjetër në rajon. Kryeministri Edi Rama tha se PS-ja pasi ndaloi me sukses hemorragjinë social-ekonomike në dy mandatet e para, prej së cilës lëngonte vendi, ndërsa shtoi se mandati i tretë i duhet për ta kaluar Shqipërinë në një stad tjetër.

“Ne na duhet një mandat i tretë jo për vete, por për Shqipërinë, me qëllim që Shqipëria të kalojë nga ecja në vrapim. kush mund ta kalojë Shqipërinë në një nivel shpejtësi, përveç PS-së së  Shqipërisë. Ne nuk jemi e keqja më e vogël, ne jemi e vetmja e mirë që ka në politikën shqiptare. Potenciali i kësaj familjeje politike është për më tepër besnikëri ndaj vlerave, shumë më tepër besnikëri ndaj atyre që meritojnë më shumë edhe në aspektin e përfaqësimit, dhe për shumë më tepër besnikëri, ndaj bindjes për të cilën të gjithë shqiptarët e votojnë, dhe do ta votojnë prapë PS”, tha Rama.

Gjithashtu, z. Rama u shpreh se Partia Socialiste ka çuar përpara reformën në drejtësi. Sipas tij, drejtësia nuk është ende aty ku duhet, por u zotua se PS-ja do t’u garantojë qytetarëve, që ky proces do të spastrojë nga sistemi çdo gjyqtar dhe prokuror të korruptuar.

“Janë vendosur themelet e drejtësisë, që fëmijët tanë të mos e pësojnë si ata që lindën në ’90 dhe që sot janë bërë burra dhe gra dhe nuk e kanë një sistem drejtësie të drejtë. Drejtësia nuk është ende aty ku ne e presim. Shqipëria sot është më e drejtë. Kur ne u kërkuam shqiptarëve votën e tyre, ne iu thamë që do t’i jepnim fund shtypjes së pabarabartë të taksës së sheshtë, dhe nuk i prekëm rrogat e pensionet siç na kërkonte FMN, dhe përgjysmuam taksën e biznesit të vogël, ulëm taksat për të gjitha ata që janë punonjës me rroga mesatare, dhe rritëm taksën për biznesin e madh. Është fakt dhe shifra këtu nuk është opinion”, tha ai.

Kryeministri i vendit, Edi Rama, u ndal edhe tek rekrutimet e punonjësve në administratën shtetërore, por edhe për garat në shkolla dhe universitetet shqiptare.

Ai shtoi se ky proces u ka dhënë mundësi të barabarta të gjithë atyre, që kanë aplikuar për një vend pune në administratë. Në mbledhjen e sotme Partia Socialiste pritet të zgjedhë organet e reja drejtuese.