Partitë politike çelin zyrtarisht fushatën për zgjedhjet e 25 prillit

Partia Socialiste dhe Partia Demokratike kanë çelur sot fushatën elektorale me aktivitete madhore në Tiranë.

Në sheshin “Nënë Tereza” në orën 17:00, PD ka ka mbledhur qindra simpatizantë, të cilët me flamuj kombëtarë dhe atë të subjektit politik kanë bërë thirrje kundër qeverisë dhe kryeministrit Edi Rama.

Kryetari i Partisë Demokratike, Lulzim Basha në fjalimin e mbajtur para mbështetësve të shumtë të pranishëm në shesh u zotua veç të tjerash, se detyra e tij e parë madhore kur të zgjidhet kryeministër është të fusë vendin në Bashkimin Evropian.

“Sot vij para jush për të shpallur një tjetër mision; kur të më zgjidhni kryeministër, detyra ime e parë madhore është futja e Shqipërisë në BE”, tha kryedemokrati.

Z. Basha premtoi se në 25 prill do të marrë fund tranzicioni i gjatë shqiptar, duke bërë të mundur që më të mirët të drejtojnë fatet e vendit.

Nga ana tjetër, Partia Socialiste e nisi fushatën zgjedhore në sheshin “Skënderbej” në Tiranë rreth orës 18:00.

Kryetari i Partisë Socialiste, Edi Rama, gjatë fjalës së tij u shpreh se kërkon një mandat të tretë, me qëllim çuarjen përpara të reformave të nisura.

“Mandati i tretë i PS nuk është një qëllim në vetvete, mandati i tretë i PS, nuk është për PS dhe për ata që PS e përfaqësojnë si deputetë, ministra, kryetarë bashkish, mandati i tretë i PS nuk është për karrigen e askujt, por mandati i tretë është që Shqipëri të mos kthehet kurrë mbrapa. Mandati i PS bën të pakthyeshme të gjitha reformat, e kundërta do të thotë humbje e të gjithë përpjekjeve dhe sakrificave dhe kthim me siguri, aty ku Shqipëria nuk duhet të kthehet më”, tha ai.

Komisioni Shtetëror i Zgjedhjeve (KSHZ) ka kërkuar nga partitë politike të tregojnë vetëpërmbajtje gjatë fushatës elektorale.

Lexoni gjithashtu: 

PD çel fushatën, Basha: Kur të më zgjidhni kryeministër, detyra ime e parë është futja e Shqipërisë në BE

PS nis fushatën, Rama: Duam mandatin e tretë që Shqipëria të mos kthehet mbrapa