Përfaqësuesit e partive të vogla përballë të rinjve në Rinvote

Përfaqësuesit e partive të vogla diskutuan sot në Rinvote përballë të rinjve rreth programeve dhe qasjeve të tyre politike përpara zgjedhjeve të 25 prillit.

Kryetarët e partive Fatmir Mediu nga “Partia Republikane”, Vangjel Dule nga “Bashkimi për të Drejtat e Njeriut” dhe Endrit Shabani nga “Nisma Thurje”, si dhe përfaqësuesit Evald Serreqi nga “Lëvizja për Ndryshim” dhe Gent Sinani nga “Lëvizja e Re” u përballën me të rinjtë Mariana Koçeku, Lorenca Bejko, Gevio Tabaku dhe Vilson Blloshmi.

Kryetari i PBDNJ, Vangjel Dule u pyet për qasjen e saj pasi tashmë është në koalicion edhe me Partinë Drejtësi Integrim dhe Unitet, e cila mbron çështjen çame. Ai nuk dha një përgjigje direkte nëse do ta pranonte këtë çështje, por tha se politika dhe historia nuk duhen ngatërruar me njëra-tjetrën.

Lexo më shumë:“A e pranon PBDNJ çështjen çame”, Dule: Historia s’duhet t’i imponojë politikës rrjedhën e së ardhmes

Dule u pyet gjithashtu edhe për vendimin e qeverisë për t’u detyruar karantinën dyjavore emigrantëve që kthehen nga Greqia përpara ditës së zgjedhjeve. Ai tha se ky vendim ishte “kryekëput politik”.

Lexo më shumë: Karantinimi i emigrantëve, Dule: Vendim politik kundër PBDNJ, Rama rrezikon mandatin në Vlorë

Kryetari i PR-së, Fatmir Mediu u pyet rreth çështjes së pronave dhe se kur mund të zgjidhet ajo për shqiptarët. Mediu tha se PR ka rënë dakord me PD-në për të një seri nismash ligjore të cilat pritet t’i japin zgjidhje kësaj çështjeje.

Lexo më shumë: Fatmir Mediu: Me PD kemi rënë dakord për ndryshimin e ligjit të pronave

Gjithashtu Mediu u pyet rreth komentit të Presidentit të Serbisë, Aleksandar Vuçiç për Lulzim Bashën dhe Sali Berishën përpara zgjedhjeve.

Lexo më shumë: Fatmir Mediu tregon çfarë fshihet pas thirrjes së Vuçiç për të votuar Ramën

Ndërkohë kryetari i Nismës Thurje, Endrit Shabani tregoi se Nisma do të jetë në opozitë pavarësisht se kush do ta qeverisë vendin. Ai u shpreh se do t’i ushtrojë trysni qeverisë përmes nismave ligjore dhe mbrojtjes së kauzave qytetare.

Lexo më shumë: Endrit Shabani tregon dy mënyrat se si “Nisma Thurje” do t’i ushtrojë trysni qeverisë së ardhshme