Sali Berisha në Gjirokastër: Edi Rama po vret shpresën e të rinjve

Ish-kryeministri Sali Berisha vijoi këtë të mërkurë turin e takimeve me mbështetëset në Gjirokastër në kuadër të nismës së quajtur “Foltorja”.

Ai e nisi fjalën duke sulmuar kryeministrin Edi Rama dhe duke bërë ata përgjegjës për largimin masiv të shqiptarëve.

“Ai që mori mandatin e tretë është vrasës i pashpirt i shpresës së të rinjve shqiptarë dhe ndaj ata largohen dhe vetëm largohen”, tha ai.

Ai komentoi paralajmërimet e Ramës për krizë energjetike, ndërsa për Berishën Shqipëria nuk vuan nga kriza e gazit, por nga keqqeverisja e Partisë Socialiste.

“Nuk është krizë e gazit në Shqipëri, është krizë e Edi Ramës. Kanë boshatisur kaskadën e Drinit dhe del e thotë do na përpijë kriza”, theksoi Berisha.

Për z. Berisha “Foltorja” synon t’i rikthejë Parisë Demokratike sovrantitetin, pa të cilin siç thotë ai partia është e destinuar të “pushojë” së ekzistuari.

“Foltorja ka ngjallur shpresë, sepse ne nuk po bëjmë asgjë tjetër, por po i kthejmë PD sovranitetin e saj. Foltorja jonë synon t’i rikthejë PD-së demokracinë dhe votën e lirë në epiqendër dhe synon t’i bashkojë demokratët”, theksoi Berisha.

Ish-kryetari i Partisë Demokratike deri tani ka zhvilluar takime në Vlorë, Durrës, Tiranë, Shkodër dhe Fieri, ku krahas simpatizantëve mbështetje ka gjetur edhe nga figura aktuale të partisë.

LEXONI GJITHASHTU:

• Sali Berisha thirrje Ramës: Mos luaj me pluralizmin se do kesh fatin e paraardhësve
• Sali Berisha në Shkodër: Qeveria Rama e ka diskriminuar këtë qytet