Luan Rama reagon pas humbjes së LSI në zgjedhjet e 25 prillit

Drejtuesi politike i Lëvizjes Socialiste për Integrim në qarkun Vlorës, Luan Rama është i pari eksponent i LSI që reagon pas humbjes së thellë që mori kjo forcë politike në zgjedhjet e 25 prillit, ku mundi të merrte vetëm 4 mandate në rang vendi.

Përmes një statusi në faqen e vet në Facebook, z. Rama i cilëson qëndresëtarë mbështetësit e LSI në këtë qark pasi sipas tij mundën të qëndronin bashkë edhe kur i patën të gjithë kundër.

Z. Rama shprehet se nuk ka asnjë pendesë që kandidoi në Vlorë, me gjithë pengesat dhe përpjekjet për përçarjen e LSI në këtë qark, ndërsa thekson se tashmë është koha për për reflektim, është koha për t’u ringritur.

“Është koha për reflektim, është koha për t’u ringritur.

Ky është mesazhi i lotëve dhe dashurisë së Monës, Junës, Anjezës, Inesit, Refit, Nikut, Edit, Morandit, Taulantit, të Filipit – Gavroshit tim të pa lodhur, Orionit të kudogjendur, Sonit të papërtuar, Vinit gjithmonë racional, Gjolekës përherë të matur e të vyer, Olsit të rajonit 4 që nuk dinte kurrë të pushonte…

Është mesazhi i të gjithëve që zjarrin e ndezur të mos e lemë të shuhet!

Vlora e meriton gjithë dashurinë dhe mirënjohjen, dhe unë e të gjithë ne qëndrestarët e LSI-së, ia kemi detyrim”, shkruan z. Rama.